العــفـــــــــــريت على كرســـــى الاعتراف

هل حققت هدفك بالحياه حتى الان؟


هل انت من المنفضين ولا المكبرين ؟


هل انت قدالمسؤليه؟


ايه الاهم الكرامه ولا الحب وليه ؟؟


بما اني خفيفه الدم .... ليس هناك سؤال خامس

وياريت الرد بسرعه ... عشان انا مش هبقى افتح كتيير لفترة كبيرة

شكرا يا شوشو على الاسئله الخفيفه والجميله فى نفس الوقت

1 - هل حققت هدفك بالحياه حتى الان ؟؟؟

للأسف لسه مش حققت هدفى فى حياتى لغاية دلوقتى ... هدفى فى الحياه انا قلت عليه هو بسيط جدا بس انا اللى صعبته على نفسى
اخلص كليتى واشتغل وارتبط بانسانه اكون بحبها
والله الهدف فعلا مش صعب ... بس اجابة السؤال الثانى هتبين السبب اللى خلانى مش احققه لغاية دلوقتى


2 - هل انت من المنفضين او المكبرين ؟؟

طول عمرى كنت من النوعيه دى ... مش فارقه معايا اى حاجه بتحصل .. مجموع الثانويه العامه عادى ييجى زى ما ييجى ... كلية تربيه رياضيه وماله مش هيضر ... اعيد سنه تانيه تلت مرات برده مفيش اى مشكله
لدرجة انى جيت فى امتحان مادة من المواد ونمت ومرحتش حتى الامتحان ... مع العلم ان النتيجة لما ظهرت جبت فى المادة دى جيد جدا ... ازاى .. الله اعلم
بس الحمد لله رب العالمين ... بداية من سنة 2008 بالظبط النص التانى منها ... اعتقد انى ابتديت اعرف انا عاوز ايه وايه اللى مطلوب منى .... النص الثانى من 2008 حصلت حاجات هى اللى غيرت فكرة التنفيض اللى انا كنت فيها دى
التزامى مع النادى بشغلى كادارى ... التزامى مع صاحبى اللى حملنى مسئولية شبكة النت بتاعته .... احساسى ان امى خلاص هيجرالها حاجه من كتر قعدتى فى الكليه ... كل الحاجات دى بجد خليتنى اقف مع نفسى لاول مرة من 23 سنه هى الفترة اللى انا عشت فيها .... والحمد لله خلصت كل مشاكلى مع نفسى و ابتديت اعمل حاجه لمستقبلى


3 - هل انت قد المسئولية ؟؟

والله اجابة السؤال ده مش انا اللى اجاوب عليها ... المفروض الناس اللى انا بتعامل معاهم هما اللى يقولوا
المفروض انى احس اذا كنت اد المسئوليه فعلا ولا مش ادها
والحمد لله لو انا مش اد المسئوليه ... مكنتش هبقى فى المكانه اللى انا فيها دلوقتى ... فى شغلى يعنى ... ومكنتش الناس هتستحملنى وافضل فى الشغل ...اكيد كنت هترفد
فأعتقد الحمد لله انى لحد دلوقتى قد المسئولية اللى مطلوبه منى


4 - ايه الاهم .. الكرامه ولا الحب وليه ؟؟

المفروض ان الاتنين يكملوا بعض .... انا بحب انسانه هحافظ على كرامتها وهى بتحبنى تحافظ على كرامتى ... وهكذا يعنى
بس الاهم فيهم طبعا الكرامه ... لان الحفاظ على كرامة الانسانه اللى انا مرتبط بيها ده فى حد ذاته مسئوليه كبيرة جدا ... ولو انا مش قدرت اتحمل المسئوليه دى يبقى ان مش استحق انى ارتبط بالانسانه دى ولا حبى ليها هيكون ليه اى قيمه


ميرسى يا شوشو على اسئلتك ... ولو لقيتى سؤال خامس انا مستنيه ... ويا ريت يكون سبب بعدك عن المنتدى الفترة اللى جايه دى خير ... ويا رب ترجعيلنا بالسلامه

ميرسى جدااااااااا على ردك يا عفريت وميرسى على اسئلتك يا شوشو ونتمنى يكون سبب بعدك خير زى ما قال العفريت

ميــرسى جداااااااا للاعضاء اللى شاركت فى الموضوع
وميـرسى بردو للاعضاء اللى مش شاركتنا
وميــرسى جداااااااا للعفريت على اهتمامه بالموضوع وعلى اجاباته المميزه والتى تتسم بالصراحه الواضحه من خلال اجاباته
وميــرسى لسير باسم على منتداه المتميز الذى اتاح لنا فرصه التعرف على الاعضاء


وفى خلال انتظارنا لاسئله السير باسم مدير المنتدى وللعضو المميز برنس الحب

نرجو من العضو العفريت ان يقوم باختيار العضو التالى لكرسى الاعتراف

بص يا سيدى
1 _ دلوقتى انت مرتبط ... يا ترى انت شايف ان حبيبتك المفروض تعمل ايه عشان تقدروا تكملوا مع بعض ؟؟

2_ انا مش عارف انت شغال فى ايه بس انت شايف ان شغلك يقدر بعدكده انه يوفر ليك الحياه الى انت بتتمناها ليك ولزوجتك ولاولادك ؟؟؟

3_ كل انسان فينا بيفكر فى مستقبله واكيد كل انسان بيخطط حياته على مراحل ....... قولنا بقى انت مستقبلك مخططله ازاى او انت راسمله صوره ازاى ؟؟؟؟؟؟؟؟

4_انت شايف ايه الشئ الوحيد الى ممكن يبعدك عن البنت الى بتحبها ؟؟؟؟

واخر سؤال
5_من اجل من تبكى ؟؟؟؟

ومتنساش اهم شئ الصراحه

اسمحلى بس فى بداية كلامى ابدى اعجابى بجد بصورة توقيعك
ومتشكر انك شاركتنا فى الموضوع بأسئلة فعلا جميله ومختلفه ومميزة
ربنا يقدرنى واقدر اجاوب عليها

1 - انا الحمد لله مرتبط بانسانه بجد محترمه جدا و ربنا يقدرنى واقدر اسعدها واحققلها كل اللى بتتمناه وكل اللى هى مستنيانى اعمله علشانها
بالنسبة للمطلوب منها علشان نقدر نكمل مع بعض .... انا اوقات كتير زى ما لخصت شخصيتى فى سؤال بندقة فى تلت كلمات وقلت انى فى اوقات كتير بتفهم غلط
انا نفسى انها تعذرنى فى الاوقات اللى ممكن اغيب عنها فيها ... وانها مش تزعل منى من غير ما تعرف اعذارى
نفسى تصبر معايا بس لحد ما اكون قادر انى اجى اطلب ايديها وتتشرف بيا ادام اهلها
انا مش هطلب منها اكتر من كده ... تستحملنى شويه بس علشان انا فعلا فى اوقات كتير بظهر بصورة غبية ورخمه جدا و ممكن تيجى فى وقت تقول ده مش بيحبنى زى ما بحبه او مش بيحبنى اصلا


2 - اولا اسمحلى اقولك انا شغال فى ايه
انا لسه طالب فى كلية تربيه رياضيه جامعة طنطا
المسئول عن النشاط الرياضى فى احد الانديه
ادارى فريق الباسكيت لفريق نفس النادى
مسئول عن شبكة توصيل نت بتاعة واحد صاحبى

اللى انا قلته ده كله انا مش معتمد عليه نهائيا انى افتح بيه بيت او اكون بيه اسره ... دى مجرد مجالات انا بكتسب بيها خبرة وعلاقات بس مش اكتر ... بحيث انى لما اخلص كليتى الاقى شغلانه تتناسب مع المجال اللى انا بفهم فيه ( الادارة الرياضيه - الشبكات والكمبيوتر ) بس تكون طبعا شغلانه ثابته بمرتب يقدر يعيشنى كويس انا والانسانه اللى انا بحبها

3 - انا حياتى متقسمه لتلت مراحل .... اول مرحلة ودى اللى انا بحاول انساها بكل عيوبها ومزاياها برغم انها مكنش فيها مزايا يعنى ... من يوم ما اتولدت لغاية ما ابتديت اشتغل يعنى تقدر تقول 20 سنه من عمرى مش عاوزهم فى حاجه .... ولا هفكر فيهم

المرحلة التانيه .. بتبدأ مع بداية شغلى فى مجال الشبكات مع صاحبى وشغلى فى النادى ... دى المرحله اللى انا بحاول اكون فيها خبرتى اللى هتنفعنى لما اتخرج ... والحمد لله انا بقالى دلوقتى فى مجال الشبكات تقريبا 4 سنين ... و كل يوم بتعلم حاجه جديده ووصلت لمستوى كويس ... و علاقاتى من المجال الرياضى اصبحت كويسه بناس مهمه فى الاتحاد وفى الانديه المختلفه

المرحله الثالثه ... مرحلة بعد التخرج ... انا راسم مستقبلى او بتمنى يعنى انه يكون خارج مصر ... انت عارف طبعا الشغل فى مصر معدش بيجيب همه ... السنادى جالى شغل فى احدى الدول العربيه الشقيقه ... مجال الشبكات ... وكان مرتبه كويس وكانت مميزاته كويس ... بس للأسف انا رفضته علشان كليتى

بالنسبة لموضوع ارتباطى وجوازى ... انا الحمد لله عندى حاجات مش موجوده عند شباب كتير وبرده فيه حاجات كتير نقصانى لسه ... الحمد لله شقتى موجوده ... ليا ورث من والدى ممكن يخلينى اجيب الشبكه والعفش والكلام ده
بس انا مش ممكن هاخد خطوة فى موضوع الجواز الا لما اكون قادر انى اعيش مراتى وحبيبتى فى مستوى كويس احسن من اللى هى كانت عايشه فيه
وان شاء الله الموضوع ده مش هيتأخر كتير ... بس طبعا هو محتاج شوية مجهود وتعب وصبر فى نفس الوقت
ده تخيلى لمستقبلى ... دعواتك معانا بقى يا برنس

4 - الشئ الوحيد اللى ممكن يبعدنى عن الانسانه اللى بحبها
ده طبعا بعد قضاء ربنا ومشيئته

الانسانه دى زى ما قلت محترمه وبنت ناس وجميله ورقيقه والف واحد يتمناها ... السبب اللى ممكن يخوفنى انها يتقدملها عريس يكون جاهز وكويس قبل ما انا اكون كونت نفسى وتبتدى بقى الضغوط من اهلها وقرايبها و كده يعنى
ده فعلا اللى قالقنى وده السبب الوحيد اللى ممكن يخلينى اسيبها او مش ارتبط بيها .... غير كده اعتقد هتكون كل المشاكل لو فيه يعنى مشاكل لا قدر الله .. هيكون ليها حل

5 - انا عمرى ما بكيت علشان خاطر اى انسانه فى حياتى
الا انسانه واحده بس
اختى
بكيت علشانها مرة واحده ويا رب مش ابكى علشانها ولا علشان حد غالى عندى بعد كده ابدا
كانت تعبانه جدا وبجد لما شفتها مش قدرت امنع نفسى من العياط

مرة تانيه يا برنس نورتنى بأسئلتك ... ويا رب تكون اجاباتى كويسه والحمد لله اجاباتى والله كلها بمنتهى الصراحه
اسف لو كنت طولت عليكوا

اول بحييك على صراحتك المتناهيه
وبجد ردودك فى منتهى الصراحه
بجد ردود جميله
ويارب متكونى فى اسئله زعلتك او ضايقتك او فكرتك بحاجه ضايقتك

بجد متشكر لمشاركتك واسئلتك الجميله دى يا برنس ويا رب مش تكون اخر مشاركه ليك فى مواضيعى

انت طلبت الصراحه وانا مش عندى غيرها ... الحمد لله ان الاجابات وصلت زى ما انا عاوز اقولها وبجد مرة تانيه شرفتنى بأسئلتك

ميرسى جدااااااا ليك يا برنس على اسئلتك الجميله فعلا وده مش جديد عليك
وميرسى بردو للعفريت على اجاباته المتميزه وزى ما قولت قبل كده تتسم بالصراحه ونتمنى ان ربنا يحقق ليك كل ما تتمنى

نرجو من العفريت ان يقوم بوضع اسم العضو التالى على كرسى الاعتراف
وهذا احد قوانين الموضوع العضو الذى يجلس على الكرسى هو من يضع العضو التالى له
ميرسى ليكم جداااااااااااااااااااااااااا جميعا

وبما انى صاحبه الموضوع فا اسمحوا لى بعد ان يقوم السير باسم بوضع اسئلته سوف اقوم بتقيم الموضوع من ناحيه صاحب أفضل وأقوى اسئله
وبالتعليق على ردود العضو العفريت