العــفـــــــــــريت على كرســـــى الاعتراف

يلا يا جماعه العفريت على كرسى الاعتراف الكل يدخل ويسأله زى ماهو عايز الحد الاقصى للعضو فى الاسئله 5

نرجو ان نرى تفاعل مع الموضوع مستنيه اسئلتكم

مرسي اليكي بندقه علي الموضوع الجميل والمميزوبكون من اول من يطرح الاسئله


1)س شو أصعب المواقف اللي مريت بها ؟
2) س شو موقفك من الحب ؟؟ وهل جربته ؟؟ هل تأمن بوجوده ؟؟
3)س -فأي قرار تتخذه هل ..... تحكم عقلك أم قلبك فيه ... ؟؟ ومن الأسبق فالتحكيم
قلبك أم عقلك ؟؟؟؟؟؟؟؟
4) س هل ندمت فحياتك على شي معيّــن ؟؟؟
5) س مالفـرق بين الحب والصداقة ؟ وهل يمكن ان يسلكا طرق الغيرة 00؟

_ما رأيك بهذه الكلمات ..
الخيانة ..
المرأه..
الصداقة ..
النميمة ..
النفاق ..
تحياتي لك
اخوك ابو ميار

فى البدايه احب اشكر العضوة الجميله والنشيطه جدا والمنافسه القويه بندقه على الموضوع ده
واشكر كمان ابو ميار صاحب الاسئلة القويه ... اللى ربنا يقدرنى واقدر اجاوب عليها

1) اصعب موقف مريت بيه ... كان عندنا دورة مجمعه فى النادى للناشئين تحت 14 سنه .. والمفروض ان فيه فريق من الفرق كان مزور لاعب ... والمفروض كمان ان انا الشخص اللى انطلب منه يثبت التزوير ده ... قعدت حوالى 10 ايام مش بعرف انام ولا بعرف افكر فى حاجه غير الموضوع ده .. لحد ما ربنا قدرنى وقدرت اثبت التزوير فعلا وقدرت اثبت ان اللاعب بيلعب فى فريق تحت 16 سنه ... بس الصعب فى الموضوع بقى ان برغم كل اللى انا عملته فى الموضوع الناس فى الاتحاد تكتمت على الموضوع علشان ميحصلش مشاكل ... وطبخوها يعنى بمعنى اصح

2 ) بالنسبة للحب .... انا طبعا معترف بوجوده ومؤمن بيه جدا .... وانا بما انى انسان فلازم طبعا اكون جربت الحب ... وانا حاليا بحب انسانه وهى عارفه انى بحبها بس للأسف الحب لحد دلوقتى مش عارف اذا كان حب من طرف واحد ولا حب متبادل ... ادعيلى يا ابو ميار

3) بالنسبه للقرارات اللى باخدها لازم الاول اكون مرتاح للموضوع اللى هاخد فيه قرار ده ... يعنى قلبى يكون الاول قبل عقلى ... بس ده ميمنعش انى لازم احكم عقلى فى قراراتى ... مينفعش اخد قرار واحكم واحد فيهم واسيب التانى ... قلبى الاول بعدين عقلى ... ولو الاتنين اتظبطوا مع بعض .. يبقى الموضوع تمام ... ولو مكنش يبقى مفيش نصيب

4) فيه حاجتين انا ندمت عليهم فى حياتى
اول حاجه ... الانسانه اللى انا بحبها دى فى وقت من الاوقات كان المفروض انى اخد قرار بس للأسف اخدته غلط وغلط جدا كمان وده يمكن يكون اكتر حاجه بندم عليها لحد دلوقتى
تانى حاجه ... الفترة اللى انا قعدتها فى الكليه زياده عن فترة دراستى .. عطلتنى عن حاجات كتير كانت ممكن تغير مجرى مستقبلى بالكامل

5 ) الحب والصداقه
طبعا علشان اتكلم عن الفرق بين الحب والصداقه الكلام هيكون كتير اوى ... لانى لازم اتكلم عن كل واحد فيهم لوحده وده محتاج مواضيع كتير مش رد على موضوع
بس انا كل اللى اقدر اقوله دلوقتى يا ابو ميار ان الصداقه ممكن تتحول وتكون حب ... انما الحب استحاله يرجع صداقه تانى

الخيانه
اكتر حاجه مؤلمه فى الدنيا ... يمكن تكون اكتر من الموت نفسه ... خصوصا لما تكون من حبيب او انسان قريب من قلبى

المرأه
نص المجتمع ... فى اوقات كتير بتكون النص الحلو ... وفى اوقات اكتر بتكون سبب المصائب
فتش عن المرأه

الصداقه
صعب تلاقيها فى الزمن اللى احنا عايشينه ... ولو لقيتها بتكون اجمل هديه من ربنا ... الصداقه اقوى علاقه بين اى اتنين بعد الحب طبعا ... اقوى علاقه ممكن تربط اتنين ببعض

النميمه
كفايه انها بتاكل الحسنات زى النار ما بتاكل فى الحطب ... ومع ذلك بتعتبر غريزة عند معظم الناس وفيه ناس مبتعرفش تعيش من غيرها ... عالم فاضيه

النفاق
من وجهة نظرى ... النفاق ده نقص فى شخصية المنافق ... ضعف ... جبن ... كده يعنى
ربنا يبعده عننا ويبعدنا عنه

يا رب تكون اجاباتى وصلت زى ما بتمنى انها توصل .... ومستنى اسئلة باقى اعضاء المنتدى

ميرسى ليك أبو ميار على اهتمامك بالموضوع وعلى الاسئله المميزه جدااااااا واجابات مميزه
ونتمنى ليك ان ربنا ينولك كل اللى فى بالك ويكرمك
بس انا ليه بس تعليق صغير على نقطه فى ردك ادام بتحبها زى ما انت كتبت ليه مش روحت صارحتها بحبك ليها وهى لو بتحبك هتقولك لو مش بتحبك اديك عرفت بدل ما انت متعلق لا طايل سما ولا ارض (اتمنى ان تعليقى مش يدايقك ويفيدك )
وننتظر تفاعل باقى الاعضاء

شكرا يا بندقه على النصيحه الغاليه
انا فعلا عملت زى ما انتى قلتى كده بالظبط
قلتلها ... عارفه كان ردها ايه
فى الاول ضحكت اكنى قلتلها نكته ... وده طبعا دايقنى وحسسنى ان سؤالى كان غبى
بعد كده قالتلى كلمه لشكسبير اللى هى بتحبه
اذا اردت شئيا بقوة فاطلق سراحه .. فان عاد اليك فهو ملك لك الى الابد .. وان لم يعد ...فهو لم يكن لك من البدايه

وجهة نظر برده ولازم احترمها ..... عموما انا هطلق سراحه ... واللى فيه الخير يقدمه ربنا

مرة تانيه شكرا على الموضوع وعلى المشاركه والنصيحه الجميله

السلام عليكم ورحمه الله وبركاته

ردودك جميله يا عفريت على فكره

لكن احبها تكون اجمل على اسئلتى


1_ صدفتين مريت بيهم فى حياتك واحده كانت حلوه والتانيه مش ولابد نحب نعرفهم

2 _ ياترا البكاء عندك ضعف زى ما كتير بيقولوا ان بكاء الراجل ضعف ولا بتبكى من منطق الانسانيه مش اكتر انا مش قصدى بكاء على حد عزيز افتقده لاسمح الله بعد الشر قصدى موقف معين خبر فى الاخبار مثلا فلم فى موقف خلاك تبكى وهكذا

3_ كلمنا عن الحب من وجه نظرك وياترا هو بيمثل معادله صعبه بالنسبالك ولا حلتها

4 _ كلنا بنتنرفز على مواقف معينه بس ياترا ايه النرفزه الى انته مش تنساها وايه سببها

5 _ مين اقرب شخص ليك على المنتدى

انا حاولت ابعد عن الاسئله الشائعه
اعذرنى لو طولت
سلامى للكل

الصدفه الوحشه الاول
المفروض انى كنت عايش فى البيت انا وخالى بس ... وخالى ده اتجوز وبقيت انا لوحدى اللى قاعد فى البيت ... بعد الفرح بتلت ايام عزمت اصحابى وقعدنا مع بعض فى البيت واحنا قاعدين ... ات عارف طبعا 4 شباب قاعدين فى بيت لوحدهم بيكون المنظر ازاى ... وكان لسه مفيش حد عندى فى البيت عرف انى بشرب سجاير ... واحنا قاعدين .. لقينا خالى واقف على باب الشقه وبيبوصلنا
بعد الفرح بتلت ايام بس ... جاى ياخد بقيت هدومه علشان كان مسافر معسكر مع الفريق اللى بيلعب فيه
طبعا دى كانت صدفه لا على البال ولا على الخاطر ... ومش محتاج اقولك ايه اللى عمله معايا بعد كده
الصدفه الحلوة
اول مرة اكون ادارى مع الفريق .. كنا فى دورة مجمعه وكان لسه مش طلعلى كارنيه ادارى ... والمفروض ان مفيش حد يتواجد فى ارض الملعب غير اللى متسجل فى اسكور الماتش وليه كارنيه .. حكم الملعب طلب منى اقعد فى المدرجات .. وانا واقف اتكلم معاه لقيت مراقب الدورة جاى بيسلم عليا بيقولى مش انت العفريت .. قلتله نعم ... قال لحكم الملعب انت متعرفوش .. ده العفريت ادارى نادى سيجر.. المراقب كان شاف النيك نيم بتاعى على الموقع وصورتى وتحت النيك نيم مكتوب ادارى نادى سيجر
سألنى الكارنيه فين .. قلتله نسيته ... قالى مش مشكله خلاص احنا عارفين ان انت الادارى خليك ... بس

البكاء
البكاء عمره ما كان ضعف
الانسان اللى يبكى بيكون انسان احساسه ومشاعره لسه موجودين ... لسه مكانهم مش اختفوا فى زحمة الدنيا اللى احنا عايشين فيها
بس بصراحه يا ميزو انا مفتكرش اخر مرة انا بكيت فيها كانت امتى ... لان انا شكلى بقيت من الناس اللى تاهت فى حوارات الدنيا دى

الحب من وجهة نظرى
الحب كلمة حلوه ... وشعور جميل ... واحساس عالى اوى
الحب الحاجه الوحيده اللى ممكن تغير عيوب الانسان
الحب عامل زى اللبن ... اقل حاجه ممكن تعكره
وساعة ما يتعكر ... انسى انه يرجع زى الاول
وصدقنى الكلام ده عن تجربه
غلطة واحده ... وتخسر كل اللى انت بتحلم بيه ... او اللى كنت بتحلم بيه
علشان تقدر تكمل فى الحب ... لازم تبقى عارف انت عاوز ايه وهتعمل ايه علشان توصل للى انت عاوزة
والحب اكبر دافع يخليك توصل وتحقق كل احلامك

النرفزة
العصبيه دى صفة بشريه موجوده عند معظم الناس ان لم يكن كلهم
انا نفسى شخص عصبى جدا ... برغم ان اللى يشوفنى ممكن يقول غير كده
اكتر المواقف اللى عصبتنى
بسبب الموقف ده كان ممكن اترفد من الكليه لولا الصدف
اول يوم دراسه .. واقف ادام شباك شئون الطلاب علشان اعرف المواد اللى انا شايلها من السنه اللى فاتت ... لقيت واحد بيزقنى وبيقولى بعد اذنك كده ... قلتله بالراحه يا عم فيه ايه .. ما تقف زى ما احنا واقفين ... قاللى يا عم .. انت فى سنه كام يابنى انت .. قلتله ابنك .. ابنك ,,,, انا بعيد رابعه ... قاللى انت بتستظرف طيب هات كارنيهك
قلتله نعم ... عاوز ايه ... قاللى كارنيهك ... قلتله ليه يعنى حضرتك مين ... قاللى انا معيد يا حبيبى ... قلتله هو انا كل سنه يجيلى واحد يشتغلنى ويقولى انا مش عارف مين ... مفيش كارنيهات
قاللى طيب تعالى معايا بقى ... وبيشدنى .. ساعتها وصلت لقمة نرفزتى ومسكت فيه والعيال اللى واقفين بدؤوا يحوشوا وناس منهم بتقوله خلاص يا دكتور ... انا سمعت يا دكتور وابتديت اهدى تانى وقلت فى نفسى عليه العوض ومنه العوض فى السنه ... لقيته بيقول تعالى معايا بقى يا نجم ونشوف انت ايه حكايتك بالظبط
وانا ماشى معاه قابلت دكتور باسكيت اعرفه من زمان .. ندهت عليه ورحت سلمت عليه وبوست وحضنت ولا اكننا اصحاب ... بيقولى ايه يابنى انت فين ... قلتله سورى يا دكتور بس فيه مشكله ... الراجل ده بيقولى هات كارنيهك .. قاللى الله يخربيتك مشكله من اول يوم
ده معيد ... وابتدى ينصحنى وينصحه ومعلش يا دكتور طنطاوى ده ابننا ومعانا من زمان وتلاقيه ميعرفش حضرتك بس مش اكتر
وعدى الموقف على خير والحمد لله
للعلم بس انا بقالى 7 سنين بدرس فى كلية تربيه رياضيه .. علشان كده اتنرفزت لما قاللى هات كارنيهك

اقرب شخص ليا على المنتدى
بحكم اصلا انى مش اتكلمت غير مع 3 اشخاص بس على المنتدى
انا بعتبر اقرب شخص فيهم لقلبى Sir Basem

اسف لو كنت طولت فى اجاباتى ... شكرا ليك يا ميزو

ميرسى ليك ميزو على اسئلتك الجميله المتميزه دائما
واجابات جميله جداااااااا منك يا عفريت

اسف يا ميزو لو كنت نسيت اجاوب على جزء من اسئلتك
بخصوص الحب هل هو معادله صعبه ولا حليتها

الحب بالنسبالى ... تقدر تقول كده اصبح معادله مستحيله
انا اصلا مكنتش بحب الكيميا ... ولا المعادلات
المعادله بتاعتى اتلغبطت ... والعناصر اللى فيها مش عارفين يتحدوا مع بعض علشان يطلعولنا ناتج مفهوم

نتمنى يحصل تفاهم بينكم وتتحل المعادله وتوصلوا لناتج صحيح زى ما انت عايز